MBUNGE: Serikali Itenge Fungu kwa Ajili ya AZAKI

Mwenyekiti wa Kamati ya Kudumu ya Bunge ya Uwekezaji wa umma Fredy Mwakibete amesema kuna haja ya Serikali kuangalia uwezekano wa kutenga fungu katika bajeti yake kwa ajili ya Asasi za Kiraia (AZAKI).

Mwakibete ambaye ni Mbunge wa Jimbo la Busekelo amesema Azaki zinawafikia na kuwasaidia wananchi wengi ambao wakati mwingine hata Serikali kuwafikia ni vigumu.

“Asasi za kiraia zinakwenda moja kwa moja kwa wananchi hata pale ambapo Serikali imeshindwa kufika nyie mnafika na mnagusa makundi yote katika Jamii ikiwemo wanawake na walemavu,” amesema Mwakibete akirejea Mchango wa Taasisi ya HakiRasimali ambayo imetoa elimu kwa watu wengi kuhusu sekta ya Uziduaji.

Amesema kutokana na mchango huo wa asasi hizo Serikali haina budi kuwa na fungu maalumu kwa ajili ya kuwaunga mkono na kuwawezesha kufika kule ambako kwao isingekuwa rahisi kufika.